為慶祝香港回歸20周年，香港郵政明日（7月1日）將發行兩套有紀念價值嘅集郵品，包括小全張、套摺同埋首日封。一套係四枚裝嘅郵票，以「香港特別行政區成立二十周年」為題。除咗展示香港社會嘅特色同埋吸引力，仲以「單點透視」嘅立體構圖方式，表達香港發展潛力無限，喺香港生活、做嘢機遇無限。呢套郵票銷售期為三個月，售價13.3蚊，售完即止，首日每名顧客限買各面值郵票各125枚。仲有，有特別郵戳蓋銷嘅首日封，只係七一喺各郵局有得買。
另外一套係香港郵政再度同中國郵政合作聯合發行，一套四張，其中兩張設計相同，以「龍騰香江」為主題，面值1.2元人民幣及1.7元港幣，印有新官員就職嘅會展中心，同埋啲市民舞龍慶祝嘅剪影。另外兩張印有人民幣嘅郵票，印有科學院，港珠澳大橋。香港郵政高級經理（集郵推廣）李振宇話，呢套郵票係邀請香港人韓秉華設計，相信回歸呢個主題會受到歡迎。
