圖：喺機場嘅大幅歡迎標語格外醒目

　　全港各區街頭尋日紅海處處，西環、灣仔、香港仔、蘭桂坊、奧海城、屯門等等地方，國旗、區旗組成大片「紅色」旗海，為迎接香港回歸祖國20年，以及歡迎中共中央總書記、國家主席、中央軍委主席習近平來港視察。睇見「紅海」飄揚於維港兩岸，鄭晴覺得，整個香港頓時散發着喜悅同愛國愛港嘅正能量。

　　西區海底隧道往香港方向嘅行人天橋上面，掛有三塊紅色大型橫額，寫上「熱烈慶祝香港回歸祖國20周年」、「香港與祖國同命運　紫荊與國旗相映輝」、「熱烈歡迎國家主席習近平蒞港視察」，令人一見醒神。銅鑼灣信和中心外、蘭桂坊一帶，亦都掛滿五星紅旗，氣勢磅礴。

　　市民停步自拍打卡

　　唔單止港島區，九龍奧海城外牆，亦掛起「熱烈慶祝香港回歸祖國20周年」嘅長橫額，而尖東海旁建築物更加璀璨奪目，整幅發光嘅五星紅旗掛喺大廈外牆，吸引唔少人停下腳步，自拍打卡！新界方面，新界鄉議局早前已經派發大批國旗區旗畀廿七鄉，預料新界有超過十萬支旗幟飄揚。就連香港國際機場都有大型廣告板寫上「熱烈歡迎國家主席習近平蒞港視察」，睇嚟好多港人同鄭晴一樣，急不及待，熱切期盼習主席快快來港。

　　除此之外，近百艘漁船亦喺香港仔避風塘整裝待發，掛滿曬Banner同國旗、區旗，歡迎習近平主席到港。漁農界立法會議員何俊賢話，百艘漁船將會披紅掛彩，喺七一慶回歸當日，由堅尼地城出發，穿過維港，直至會展中心，向全香港傳遞愛國愛港、喜賀回歸嘅正能量。 大公報記者

林良堅 麥潤田 何嘉駿（圖）