香港回歸20周年，「七一」慶祝活動超級豐富！維多利亞港除咗當晚有煙花表演外，船公司「洋紫荊維港遊」更會喺當日起，再度舉辦「懷舊汽車渡輪遊」。乘車出海不是夢！
「懷舊汽車渡輪遊」活動分別舉行五日，包括7月1日、8日及22日喺九龍觀塘汽車渡輪碼頭出發；以及7月15日及29日喺香港北角汽車渡輪碼頭出發。
每日共有兩場，分別上午11點15分同下午兩點開始。每場時間約90分鐘，船上仲設有懷舊美食同飲品。
收費方面同舊年「斷車斷人頭計」有些小分別，今年「一架香車配兩位美人」盛惠280蚊，「獨行俠揸電單車」收費150蚊。額外人數每位收費100蚊，大小同價，四人同行一人免費。
如果車牌有「20」字眼，仲全單半價！船公司透露，活動喺上年復辦時勁受歡迎，活動每次可接載26至28架車。想揸住自己嘅靚車渡海？咪錯過大好機會呀！
