網友謔稱為「西瓜琦」嘅「本民前」梁天琦，日前終於蒲頭啦！英國時間星期一下午，佢喺劍橋大學香港及中國事務會發表演講，繼續唱衰香港，又話自己離開咗香港五個月在海外讀書，英文好咗添，自己可以做嘅就係繼續進修自己；仲話完咗英國演講，之後就會去美國同加拿大演講。嘩！「西瓜琦」閃咗去外國風流快活，仲大講風涼說話。

所謂論述都係呃選民

　　講返「西瓜琦」呢場「演講騷」，問答環節先至精彩。台下有人問佢「本土派」應唔應該參加遲啲嘅立法會補選，一向以攻擊「泛民」撈政治本錢嘅佢居然咁答，話「本土派」應該同「泛民」合作喎，皆因喺咁嘅環境之下，「本土派」都無咩人可以出選，仲話要保住梁頌恆、游蕙禎原本嘅議席先係最重要，建議「本土派」同「泛民」進行初選或者辯論，咁先係最有利做法。

　　呢番說話肯定激死一班「本土派」支持者！梁天琦扭軚咁急，有人隨即問佢點解屈尾十由批評「泛民」變成倡議同「泛民」合作，「西瓜琦」就咁答，「香港都變到咁，成班人都去曬坐監，仲有本錢內鬥咩？無啦，仲關唔關邊個揸住民主運動大旗嘅事？呢個已經唔係問題。」

　　所以話，啲咩「本土派」根本就係一個笑話，咩咩論述都係呃選民嘅講法啫！睇下梁天琦，咁多後生仔判監，佢就逍逍遙遙繼續喺海外風流快活，真係好好笑！