圖：主辦單位一行人前往科儀場地進行視察
今個星期日（11日）又係一年一度嘅哪吒太子寶誕日。今年有一位特別來賓參加，香港黃大仙師渡海，去到澳門大三巴哪吒廟，百年間第一次離開香港。「丁酉年二○一七哪吒太子寶誕」活動尋日舉辦咗新聞發布會，嗇色園黃大仙祠監院李耀輝就話，呢次嗇色園有超過一百人參加「澳門祈福迎祥獻供大法會」同埋「飄色大巡遊」，為澳門居民祈福。
哪吒寶誕當日，嗇色園嘅監院同埋主科道長將會為哪吒聖神賀誕祝壽，會喺澳門議事廳前進行「禮十方」嘅祈福科儀，通過禮拜「十方天神」，以示懺謝、悔愆，為澳門民眾祈福，祝願澳門風調雨順。
李耀輝話，「呢個跨境大型法會都係第一次做，希望畀多啲人了解我哋中國傳統嘅宗教文化」。
除咗法事，「飄色大巡遊」都係重點嚟嘅，鄭晴就打聽到，嗇色園道長、經師、醮師都會陪同黃大仙師一起加入巡遊隊伍，黃大仙師乘坐由傳統木雕工藝特製嘅「鑾輿」，同其他道教仙聖一齊，畀啲民眾睇佢哋嘅「真容」。仲有，巡遊期間，傳統法器、十八般武器、廿八星宿旗、五嶽真形旗等道教傳統聖物都會「一展風采」。
