圖：吳安儀（右）希望大家支持救援組織協助災民
正當大家諗緊今日中午食咩好嘅時候，東非正值糧食危機，好需要大家幫手。到底香港市民點樣幫災民渡過難關？
香港紅十字會、樂施會、國際培幼會（香港）、香港救助兒童會及愛德基金會尋日發表聯合呼籲，希望大家關注東非糧食危機，而佢哋喺社交媒體開展一個月嘅「六月『非』餐」籌款活動，仲請咗曾俊華、方力申、吳安儀同莊陳有出席啟動禮。
問及打桌球嗰陣，「stay hungry」係點解，四眼Cue后吳安儀話，就係用飢餓的感覺喺精神上追求挑戰，不過東非災民面對現實上的飢餓，卻係無得選擇，而家東非面臨嚴重糧食危機，希望大家多多支持救援組織協助災民。
「六月『非』餐」點樣幫到災民？喺六月期間，市民可以選擇任何一餐，以減量同進食最簡單食物為標準，並捐出嗰日飯錢畀其中一間救援機構，之後喺社交媒體上載相片，標籤三位朋友，咁樣就可以畀到朋友知道呢個信息，從而一傳十，十傳百咁話畀更加多嘅人知道東非糧食危機嘅問題，再加上「#六月非餐#東非#糧食危機」，市民只要輸入呢啲關鍵字，就知道到底有幾多香港人為東非災民打氣啦。
