圖：劉家穎收工變為乘客 劉家穎fb圖
80後城巴靚女車長劉家穎最近喺Facebook開咗個專頁，短短幾日已經吸引7000幾人追蹤，人氣急升。小妮子近日上載幾張新相，其中一張係佢收工坐喺雙層巴士上層休息嘅相，由司機變為乘客身份，不過鄭晴好好奇，究竟張相係邊個幫佢影嘅呢？
專頁「家穎的巴士生涯」，上星期三開始運作，最初只係上載佢昔日成為城中熱話嘅舊相，直至最近幾日，先至開始上載新圖片，其中一張係佢收到來自澳門嘅讚揚信，家穎形容「個（嗰）一刻我真係呆左（咗），太誇張了吧」，仲話依家埋站時，仍然有乘客「目定口呆咁望住我，覺得女仔揸咁大部巴士始終唔太適合」，但佢強調，絕對唔會介意別人嘅目光喎。
想見多靚女車長幾面？家穎主要駕駛城巴788線，往來小西灣（藍灣半島）至中環（港澳碼頭）。不過鄭晴提提大家啦，家穎已經有男朋友啦！
