圖：太空館前晚fb發文提及捕捉火流星　　資料圖片

　　火流星襲港！有市民前日響facebook「Tai Po 大埔」群組發文，指「頭先有無人見到好似有粒幾大嘅流星快速降落？剛在林村天台見到……快到想影低都唔得」，之後有人分享拍到流星墜落的車cam影片，引起大家熱烈討論。

　　有市民話「好近，藍綠色」，有市民更分享幾星期前拍到相類似影片，亦有市民講笑指「UFO出沒，地球很危險」。

　　太空館即晚喺facebook發文，指當晚10點42分，太空館西貢遙控天文台全天攝影機，捕捉到一顆火流星掠過東面低空，表示它與最近的寶瓶座η流星雨無關，應該係偶發流星。據太空館助理館長劉啟業話，全球每日都有大概100公噸唔同大小嘅太空物質跌入大氣層，火流星唔算罕有，但除非正值流星雨，同一地點唔會頻密出現，而2015年11月6日亦曾有火流星響香港上空出現。

　　怕唔怕砸穿頭？

　　咁到底流星會唔會砸穿我哋個頭呢？劉啟業叫鄭晴唔使擔心，除非流星沒有完全燃燒殆盡而成為隕石擊中地面，或極接近地面令地面物件被空氣中嘅衝擊波破壞，否則對市民無太大影響。天文台科學主任陳恩進同樣叫大家放心，流星屬正常嘅天文現象，當晚10至11點大致天晴，由於少雲關係，天文現象亦較平時容易見到。

　　香港天文學會會長梁淦章就解釋畀鄭晴聽，當流星體積太大，喺大氣層未能完全燃燒氣化，接近地面時有機會爆開，形成我哋見到嘅火流星，佢話唔單止會有火光，近距離甚至有聲。

　　佢舉2013年2月15日俄羅斯車里雅賓斯克市地區的長空並發生隕石爆炸為例，爆炸所形成嘅衝擊波在數分鐘後到達地面，造成逾千人受傷，原因是來自於受衝擊波影響而碎裂的窗戶玻璃，但呢種情況其實唔多見，科學家都努力諗緊方法預測隕石軌跡，希望杜絕造成任何傷亡。