大公網5月23日訊（記者龔學鳴）一講起屯門、元朗係咪有牛牛，一定會被朋友鬧。之但係，香港仲有好多地方係有牛嘅，例如係塔門。新民黨主席葉劉淑儀就係facebook發帖，話同朋友去咗塔門郊遊，相片之中，就真係見到牛牛啦。目前塔門居民只有百幾人，逢星期六日先會有渡輪來往黃石碼頭開往塔門。
塔門到底有幾靚呢? 葉太就話，當日遇到兩個愛好山水嘅瑞士人，佢哋都話塔門景色十分怡人，即使瑞士雖然有山有湖，卻睇唔到海洋。葉太又話，同意塔門嘅海岸線的確十分壯麗，海浪拍打到岸邊，掀起一朵又一朵的浪花。再望遠啲，就係深圳的大鵬灣。另外，由於塔門位於東面，可以睇到好靚嘅日出景致，所以每逢周末，好多後生仔嚟塔門露營。
香港有咁靚嘅自然風景，葉太就建議旅發局應該向外國遊客推介一下香港各區自然風景。香港嘅自然風景的確係好靚嘅，希望遊人都要好好珍惜，唔好破壞大自然啦！
