大公網5月22日訊（記者龔學鳴）大家成日飲用嘅東江水，有無諗過成個運輸，以至過濾等過程係點嘅呢?今日發展事務委員會參觀木湖原水抽水站及大埔濾水廠，委員之一、民建聯劉國勳喺facebook發帖，東江水運輸到香港之後，第一站就係去木湖抽水站。為咗確保水質，抽水站24小時監察水質；每年亦會抽取1200個樣本，作嚴密品質監控。
有啲反對派成日都話東江水質素好差，劉國勳就話，事實上，自從用咗專用管道後，輸港東江水質已經提升，符合國家最高標準；抵港經過處理後，到戶食水更加符合世衛嘅標準。不過，深圳排洪嘅個別日子，水質會受到影響，內地當局正進行「沙灣河綜合整治工程」應對，相信項目完成後，水質將更有保證。佢又話，經過兩次考察，睇到香港同內地政府喺東江水質方面落咗唔少功夫，佢未來都會繼續跟進東江水水質同水價問題。
