圖：陸頌雄拍下商戶於天耀街市結業時的落寞神情 /陸頌雄提供
工聯會立法會議員陸頌雄（Michael）一向喜愛攝影，身為議員間中喺做地區工作同時，亦會順便影下相，更加曾經將自己嘅攝影作品交畀東華三院做宣傳品。唔講你未必知，原來陸頌雄曾經差啲成為攝影記者！
陸頌雄話，佢中學時已經好鍾意攝影，更加去職培局上堂學影相，所以當佢未有穩定工作嘅時候，曾經去面試應徵過攝影記者！佢記得當時同面試嘅人就住影相傾得相當投契，本來以為自己會成功入職，可惜最後無下文。
後來陸頌雄加入工聯會，成為區議員之後仲有喺工聯會義務教攝影班，就係咁樣認識咗而家嘅太太。身為一個攝影發燒友，陸頌雄到今日仍然以將來出一本自己嘅攝影集為目標，而家都有間中喺黨友搞嘅活動做下義務攝影師，儲嚇「子彈」咁話。
