圖：英超曼聯球星伊巴謙莫域向港產名醫傅浩強送上簽名球衣，以示感謝/傅浩強圖片
「港產骨聖」傅浩強今個月初喺美國匹茲堡大學，成功幫曼聯球星伊巴謙莫域醫好膝傷，延續職業球員生涯，伊巴感恩圖報，昨日向傅醫生送上一件親筆簽名球衣，傅醫生同鄭晴講，會將件簽名波衫鑲喺辦公室作為紀念。
鄭晴昨晚收到傅醫生短信，話好開心收到伊巴送上親筆簽名波衫。鄭晴望過圖片，只見伊巴四萬咁口，喺件九號曼聯波衫上面簽名，仲用英文寫上感謝語錄「To Freddie Fu！With love and success. Thank you for eveything！Keep doing your great work and magic！」大意係「親愛的傅醫生，感謝你的一切，請繼續你偉大的工作，創造奇跡！」
鄭晴打長途電話，再次恭喜傅醫生手術成功。本身係曼聯球迷嘅傅醫生笑言，會將件簽名波衫鑲喺辦公室，佢仲話伊巴份人毫無架子，好有禮貌，仲好強壯，祝願伊巴早日康復，喺球壇再創高峰。
傅醫生同鄭晴透露，整個治療接近兩星期，其間曾經請伊巴品嘗中國炒粉麵，伊巴食完仲大讚好好味
