圖：李心怡以105下成績，打破匈牙利女將於2015年所創下嘅104次世界紀錄，勇奪冠軍

　　可喜可賀！兩名港產少女先後為港爭光，難得嘅係：動靜皆能！邊個再敢輕言「少年，你太年輕了」？

　　「動」方面，先有「摩打腳」少女、14歲嘅李心怡，上周六（6日）喺澳門舉行嘅「兩岸三地學生跳繩邀請賽」30秒速度跳繩比賽中，以105下成績，打破匈牙利女將Eva Hanuszik於2015年所創下嘅104下世界紀錄，勇奪冠軍！

　　「香港運動員永不服輸」

　　心怡話，今次奪獎絕對是喜出望外，但絕對唔會自滿，因為自己仲要打破更多的紀錄。佢話「好開心，多謝爸爸、媽媽同教練Roy Sir，諗唔到會跳到105呢個數出嚟，知道嗰刻真係估唔到，希望以後可以繼續上到更高嘅數目！」

　　Roy Sir就話，心怡今年能夠勇冠，除咗努力，仲體現咗香港運動員永不服輸嘅精神，「心怡平時練習最好一次都係104下，有呢個成績，絕對係心怡將目標定得更高，督促自己去達成。」

　　心怡嘅「頭號粉絲」、李爸爸同媽媽就話，希望囡囡以後可以繼續努力，會永遠支持佢。

　　「靜」方面，就有年僅12歲嘅小提琴少女黃沛盈，佢上周五（5日）喺俄羅斯莫斯科舉行嘅「第七屆國際楊波斯基小提琴比賽」中，憑精湛琴技，力壓全球各地嘅少年小提琴手，勇奪世界冠軍寶座，成為首位獲此獎項嘅港人，又多一位「香港的驕傲」！

　　兩位新紮「香港之光」，鄭晴百分百撐你哋，加油！