圖：港青赴日本工作假期申請急升/資料圖片
年輕人嚮往去外國working holiday，鄭晴facebook經常畀去咗澳洲工作假期嘅朋友洗版，不過立法會文件顯示，原來港青對澳洲熱愛慢慢減退，由2014年一年成萬人去，跌到舊年全年得5269人；反而日本放寬咗名額後，就急升近兩倍，有600幾人去。至於最「崇港」嘅年輕人就係韓國，舊年有758人嚟香港工作假期。
話說自2001年起，香港特區政府先後同11個經濟體系政府訂立雙邊工作假期計劃協議，呢啲國家就包括新西蘭、澳洲、愛爾蘭、德國、日本、加拿大、韓國、法國、英國、奧地利及匈牙利。
睇返立法會文件，根據工作假期計劃夥伴經濟體系政府所提供的資料，截至舊年年底，已經有成7.8萬名香港青年獲批工作假期簽證。最受歡迎嘅仍然係澳洲，有成5000人去，其次就係英國，每年都keep住有1000人左右，急升到第三位嘅就係日本。
調返轉，嚟香港工作假期嘅人裏面，最多係韓國人，舊年有758名青年，其次就係法國，有500名，至於英國就有330人。鄭晴提提你，仲未滿30歲嘅年輕人想去working holiday就快快報名啦！
