圖：花展閉幕是邀請弱勢社群參與的首場慶祝活動　　/張建宗網誌圖

　　「香港始終有你，十萬個驚喜多一世紀，感謝你，小天地，創天地……」回歸十年的主題曲音猶在耳，香港又迎來回歸20年嘅大日子啦，政務司司長張建宗尋日喺網誌透露，政府籌備咗連串活動同市民共慶回歸，而且為20周年編製咗新嘅主題曲，仲會發行一啲有趣嘅紀念品，例如印有「20 HK」字樣嘅襟章，款式包括彩繪圖、黃色鴨仔等。

　　張司長話，回歸20周年，香港喺推動經濟、改善民生、社會發展等方面都有長足發展，成績令人鼓舞。20周年紀念嘅主題是「同心創前路 掌握新機遇」（Together．Progress．Opportunity），政府重視全民參與，希望基層家庭、弱勢社群、少數族裔同傷殘人士都可以分享回歸嘅喜悅，所以當局會舉辦一連串關懷活動，包括探訪30萬戶家庭，又會安排基層家庭免費參加慶祝活動，例如大型體育賽事、文藝表演等。花展閉幕是邀請弱勢社群參與嘅第一場慶祝活動。

　　佢又提到，有唔少慶回歸活動是專為青年而設，當局已經招募咗100名年輕人，出任20周年慶典活動青年大使，幫手響國際會議同大型活動協助接待外賓兼推廣香港。特區政府仲特別喺今年暑假推出兩個重點青年實習計劃，安排香港嘅年輕人到北京故宮博物院同四川卧龍自然保護區，參與文物保育同自然保育嘅工作添。

　　鄭晴