特首選舉候選人胡國興再度語出驚人，尋日公然呼籲反對派選委「配票」，話反對派選委應該「分散投資」，分別畀兩名候選人各160票，藉以由第一輪投票結果掌握建制派選票流向，到第二輪投票時，再集中投畀其中一個取得較多建制票嘅候選人。佢又話自己好有信心取得約280名非民主派選委支持票。
之不過，反對派選委似乎唔多Buy胡官意見，負責協調「民主300+」選委嘅公民黨立法會議員郭榮鏗就話到明，「民主派選委無分票嘅條件，只有團結嘅需要」，又叫選委團結一致，集中投票畀同一個候選人，擔心再唔團結，就發揮唔到作用。郭榮鏗仲暗串胡官，叫佢認清形勢，「睇清楚自己站的位置」咁話，又重申有好多「民主派選委」都唔認同胡官意見。
另外，「佔中」、雷動禍首戴耀廷亦頻頻出動，連續兩日開記者會，宣布27位反對派決定按所謂嘅「民間投票」結果投票，法律界選委張達明、反對派立法會議員毛孟靜、社福界選委王惠芬等都捆綁咗，戴耀廷仲好自豪咁話，社工總工會20名選委今日開完會後，都好可能加入行動。鄭晴就覺得，反對派成日口口聲聲話民主，但轉頭又要捆綁又要分散投資，好似驚死選委有個人意志去選擇心水候選人，民主何在？
