Eunice日常工作雖然忙，都喺手機準備好恐怖片同恐怖game隨時「鬆一鬆」！
文｜鄭晴
之前鄭晴同大家分享過，容海恩（Eunice）好鍾意睇恐怖片，但Eunice平時又要搞地區工作，又要忙立法會嘅工作，邊有咁多時間去睇戲呢？原來Eunice會將大量以前拍嘅恐怖片集儲存喺手機入面，方便一得閒就會拎出嚟睇一陣！聽佢講，原來電視台喺90年代之前都有拍唔少恐怖片或者劇集，而且劇情比而家嘅恐怖片更加有深度，仲有好多本地獨有嘅文化喺裏面，例如係問米。
除咗睇片，Eunice仲有download恐怖手機game玩，中介紹鄭晴一齊玩！Eunice話呢隻game要戴入耳式耳機聽聲，無畫面，只要合埋眼就可以玩，淨係聽聲，用手機篤mon模擬行路探險，行行下隨時會有怪獸撲埋嚟咬你！成個玩法就好似無畫面嘅VR（虛擬實境）遊戲，淨係諗嚇都覺得好恐怖，而且重點係隨時可以玩！
講開打機，原來Eunice已經有返咁上下「機齡」，佢話自己由細細個就開始打機，見證住機鋪行業式微，不過近年已經無咁多時間打機，得閒嗰陣都只係玩嚇手機遊戲就算喇。
