大公網2月8日訊（記者龔學鳴）「有燈無月不娛人，有月無燈不算春。」識得呢首詩，大概都知講緊咩啦！雖然而家無咩人特別慶祝元宵節，但係呢個傳統節日，康文署每年都會搞大型綵燈會，今年嘅地點仲包括文化中心露天廣場、荃灣沙咀道遊樂場同埋北區公園，相當方便呢！唔好以為呢三個綵燈會係一色一樣，其實係三個都各有特色，例如文化中心綵燈會就係以中國傳統建築「影壁」為設計靈感，配以三盞大型走馬燈作點綴。
至於沙咀道綵燈會就係以古代市集攤檔和人物為造型的綵燈組，呈現繁華熱鬧嘅景象。讀者以為綵燈會就一定老套?少年，你太年輕了。北區公園綵燈會除咗有五米高嘅走馬燈之外，仲有以時下「潮語」為設計靈感嘅「潮語動畫廊」綵燈。不過要留意，荃灣綵燈會係星期五舉行，文化中心就係星期六，北區公園就係星期日。
