圖：容海恩忙到未同屋企人食開年飯\大公報記者馮瀚林攝
新民黨容海恩（Eunice）既係立法會議員，又係大律師，兩樣職業嘅工作量都相當驚人，近排佢仲要幫忙新民黨主席葉劉淑儀競逐特首選舉，到底佢忙到咩程度呢？尋日Eunice同傳媒茶敘嗰陣，就話由立法會選舉一直忙到而家，新年又會落區，都無咩時間陪屋企人。尋日年初六，佢忙到連開年飯都未同屋企人食！Eunice仲同鄭晴講，自己而家一個月只係返兩次公司，而一個月只係上庭一、兩次。問及忙到幾時，Eunice就笑笑口話，而家到三月都唔可以放假啦。
好多新片趁賀歲檔上映，不過鍾意睇戲嘅Eunice梗係忙到唔得閒去睇啦。估唔到Eunice好鬼鍾意睇恐怖片添！入門級數嘅《人形蜈蚣》一至三集佢都睇過呢！Eunice又講埋擇偶條件，話最緊要係願意陪佢一齊睇「18禁」恐怖片。但廣大宅男唔使自告奮勇喇，查實Eunice已有男友，究竟幾時拉埋天窗，Eunice就話，隨緣啦！
