圖：尹志田（右二）同三名年輕人分享奮鬥歷程

　　「機會係留畀有準備嘅人」，呢句座右銘聽落老套，不過橋唔怕舊，連港燈CEO尹志田都用佢嚟勉勵年輕人。

　　尹志田尋日就同三位「影子工程師」分享由工程師變身為企業揸Fit人嘅心路歷程，三位「工程師」係來自新界鄉議局元朗區中學同李求恩紀念中學嘅中五生，佢哋早前參加咗港燈「綠得開心推廣大使」計劃，成為最傑出大使，就可以同尹志田對話，兼跟港燈環境工程師實習一日，Cosplay下工程師。

　　同份工拍拖近40年

　　所謂「三歲定八十」，但尹志田就中三先「定八十」，當年就認定要做工程師。鄭晴都未出世，但尹志田喺1978年就已經加入港燈，更加走遍全世界擔任唔同職位，幾十年前就經歷「一帶一路」，由中東至歐洲到南美及澳洲等，就係當時做足準備，令自己由工程師晉身CEO。

　　同份工拍咗拖就快40年！其中尹志田對南丫發電廠特別有感情，皆因佢見證着行業變遷，發電燃料轉變。最初電廠喺鴨脷洲，以燒油發電，後來電廠搬到南丫島並改用燃煤，呢項搬遷工程佢自己都有份參與。

　　時至今日，更加由燃煤改為更多用潔淨天然氣，未來仲會計劃再進一步提升使用天然氣比例，由而家三成燃氣發電比率增加至2020年的50%及2022年的55%。