台灣作家龍應台早前喺香港大學演講期間問出席者嘅啟蒙歌係邊首歌，浸會大學副校長周偉立答係《我的祖國》，並引起全場大合唱，近日短片喺網絡熱傳。新聞統籌專員馮煒光尋日喺報章撰文話，對事件表示驚喜，因為港大近年被一系列政治事件衝擊，在有前學生會領導層公開稱許「港獨」，甚至歡迎「港獨」和「疆獨」合流之後，「驚喜地看到仍然有一大批同學忽然合唱起《我的祖國》，場面感人」。
馮煒光話，近年有人將「爭取民主」同「祖國認同」對立起嚟，但西方所有民主國家都是以國家認同為基礎，如果香港要爭取一個合乎國際標準嘅民主制度，亦應向西方政壇這份國家認同睇齊。
講咗咁多，馮煒光亦提到佢自己嘅啟蒙歌，同龍應台演講當日一位同學提及嘅歌曲一樣，都係《義勇軍進行曲》，即係國歌。佢憶述話，當年喺港大學生會籌辦四川大學交流團嘅時候，一眾同學喺成都一個景點嘅小坡上，興致到來，就集體唱起這首歌，佢仲記得係電影《風雲兒女》嘅主題曲。
咁啱得咁橋，當日喺龍應台嘅講座上，都有學生提到啟蒙歌就係《義勇軍進行曲》。
