圖：「一舊雲」（下紅圈）同錢志庸（上紅圈）開會期間火藥味濃/大公報記者陳卓康攝

　　個別監警會委員近年開會討論水平每況愈下，一係開會遲到缺席，一係無做功課，發言九唔搭八，為鬧而鬧。鄭晴講緊嘅係有「一舊雲」之稱嘅民主黨黃碧雲，尋日監警會同警方舉行聯席會議，其中一個環節，警方介紹協助邊緣青年重回正途嘅「奮進計劃」，但黃碧雲就發問話唔明關監警會處理投訴咩事，鄭晴聽到都不禁搖頭嘆息，同場委員錢志庸律師就忍唔住發火斥責佢，既然覺得唔關事就出少句聲囉，火藥味甚濃。

搞好警民關係預防投訴

　　其實，警方過去會議都有邀請不同單位介紹工作，但黃碧雲並唔係次次都出席，投訴及內部調查科總警司張建光（KK Sir）亦禮貌地回應，警隊一直有做青少年工作搞好警民關係，對預防投訴都好有幫助，投訴警察數字今年首十一個月有1360宗，預計全年會比去年減少約4%，佢哋會繼續實事求是咁處理投訴，如發現有不足，一定會跟進同改善。

　　不過好在，九位監警會委員包括黃碧雲，將於今年底任期屆滿後離任，尋日係佢哋最後一次開會，警隊中人私下向鄭晴呻話終於「甩難」，以後開會唔駛受無謂氣啦。據知，政府會喺今個星期四公布委任新一批委員，星期五刊憲，希望監警會新一年有新人事，可以有一番新氣象啦！