圖：心形大禮係咪好浪漫呢？/網上圖片
又到聖誕！又到聖誕！嚟緊星期日就係聖誕節啦，唔知大家諗好送咩禮物未呢？民建聯立法會議員陳克勤就已經提早收到份咖啡色心心形嘅「聖誕大禮」，仲「寫包單」你唔會估到係咩。正當鄭晴以為佢係心形牛扒咁浪漫之際，克勤竟然斬釘截鐵咁話「錯！它是一劈牛屎」，仲要係純天然絕無人造色素添加嗰隻。
送「屎」做聖誕禮物咁大整蠱？大家千祈唔好以為有人「惡搞」，克勤自己就相當歡喜份禮物啵。佢話，份禮係團體「西貢護牛天使」親手製作，因為自從本地牛退役不再耕作後，西貢有好多流浪牛牛，好多司機成日都不小心撞到佢哋，令牛牛受傷之後又唔理，所以不時都會幫「護牛天使」聯絡漁護署，探討流浪牛隻問題，所以團體送上呢份牛BB糞便答謝佢。
克勤話，真係咁大個仔第一次聖誕禮物收「糞便」，不但只無異味且十分有意義。既然牛牛轉行為盆栽提供最天然嘅肥料，克勤亦都將心心分開咗一半，分別喺立法會同屋企種花，仲笑住話：「其實插在牛糞上嘅先係最靚嘅鮮花。」咁別出心裁，睇嚟聖誕送水杯同鎖匙扣呢啲例牌嘢，真係過曬氣啦，環保才是王道！
