話咁快就到十二月，聖誕節月尾就嚟到，相信好多市民都諗住約埋三五知己聯誼一番，就連立法會主席梁君彥（Andrew）都唔例外，不過佢就慘食檸檬。佢尋日回應傳媒有關議員回鄉證問題嘅時候，自爆自己早前曾經邀請議會同事「去附近嘅地方吃喝玩樂」，希望能夠增進大家嘅感情。Andrew嘅黨友、經民聯副主席林健鋒（Jeffrey）就話有份發起今次活動，佢仲話自己係佛山人，唔少議員好似李慧琼、葉劉淑儀、馬逢國，仲有前立會主席曾鈺成、同民主黨劉慧卿都係鄉里，卿姐仲講過一旦拎咗回鄉證後，要同佢返鄉下添。Jeffrey又猛咁介紹佛山有好多嘢睇、好多嘢食，話可以行下祖廟、食下雙皮奶，點知議員同事反應「唔係咁好」！

　　唔係唔想去 要把握機會落區

　　因乜事連建制派都冷待Andrew嘅邀請呢？原來大家嗰幾日行唔開。民建聯劉國勳就透露，最近確實收到Andrew私下邀請，話希望約同事喺今個月17至18號（星期六、日）去佛山玩嚇，但自己公事繁忙，所以婉拒咗對方。佢話，自己身為「雙料議員」，平日已經用曬啲時間嚟處理議會事務，所以假日要把握機會落區，無辦法赴約。另有建制派議員話，佢哋嘅WhatApps群組只得經民聯幾個人和議，睇嚟佛山之行隨時變成經民聯外遊啦。