圖：香港總商會舉辦第六屆免費乘搭電車渡輪日，啟動儀式尋日朝早喺西環屈地街電車廠舉行　　 大公報攝

　　香港總商會尋日慶祝創會155周年，舉辦第六屆免費乘搭電車渡輪日，請全港市民免費搭電車同天星小輪，香港總商會主席吳天海話，舉辦今次活動係為咗答謝全港市民多年來對商界同商會嘅支持，唔少市民都因為呢個活動改以電車代步。

　　活動嘅啟動儀式尋日朝早喺西環屈地街電車廠舉行，主席吳天海、總裁袁莎妮、多位理事同各會員公司代表都有出席。吳天海喺活動啟動儀式致辭嗰陣話，總商會成立咗155年，一直服務香港，就好似電車同渡輪一樣係香港嘅中流砥柱，同香港一齊經歷咁多年嘅高低起伏。吳天海又話，總商會嘅會員相當具代表性，為香港提供差唔多三分一嘅勞動人口職位，今次請市民免費搭電車同渡海小輪嘅活動有五十幾間機構同企業支持。總商會成員喺儀式完結之後就搖響手上嘅傳統電車鈴鐺，四架載住總商會成員嘅電車就由電車廠浩浩蕩蕩咁出發喇！

　　鄭晴上次去呢個活動嘅記者發布會嗰陣話過會出嚟遊下「電車河」，我無走數。由西環搭到金鐘，再由金鐘搭到北角，兩程車同經過嘅每架電車都企滿曬人！鄭晴喺電車見到一位媽媽帶住囝囝一齊搭電車，囝囝問媽媽點解可以免費搭車，媽媽聽完仲教小朋友要多謝總商會請搭車，由此可見，商會嘅努力真係有市民欣賞㗎！