大公網11月24日訊（記者龔學鳴）「一日係老細，一世都係老細」，今日末代港督彭定康到港，「禍港四人幫」之一嘅「民主阿婆」陳方安生急急腳走去接「前老細」機，全程笑到「四萬」咁口，諂媚之態十足，估唔到過咗咁多年，都一樣咁「忠心」。
肥彭嚟港究竟為乜？原來陳方安生唔單止近年四圍去衰香港，聽日仲準備在港搞一個名為「香港管治：禮崩樂壞？」嘅論壇，搵埋前老細撐場咯。個論壇會傾乜嘢？齋聽個名都知咩回事，論壇簡介都寫到明，回歸廿年香港「管治質素每況愈下」，「政府施政一籌莫展」雲雲，一望就知係一班人坐埋度一齊唱衰香港啦。
原本呢個論壇都有邀請前立法會主席曾鈺成出席，但曾鈺成早兩日推咗，拒絕與彭、陳同場，主辦方唯有臨時臨急搵咗公民黨創黨主席余若薇嚟頂數，咁就更加係自己友坐埋一枱，自娛自樂了。
