圖：陳沛然每次開會都會帶急救包以備不時之需
新任醫學界議員陳沛然上任剛過一個半月，就已經喺議會出勤兩次照顧傷者，喺出席公開活動時亦曾經幫手診治暈倒嘅市民。陳醫生話，自己最記得就係梁頌恆、游蕙禎帶議員助理衝擊會議室嗰日，佢原本喺休會期間準備去黃竹坑開醫委會，結果落樓嘅時候發現自己留咗公事包喺會議室，就即刻返去攞啦。陳醫生仲喺等嘅時候，就收到電話，話有保安喺衝擊中受傷，請佢返去幫手。醫者仁心，陳醫生梗係第一時間趕返會議室照顧傷者啦，直到將佢哋送上白車完匆忙咁趕去黃竹坑開會。陳醫生之後發現立法會嘅急救箱全部喺保安室入面，會議室入面就無任何急救設備；佢就自備咗一個急救包，去立法會開會嘅時候就會帶住，擺喺自己座位下邊，以備不時之需咁話。
