王國興希望所有道具能夠在歷史博物館有個容身之所。大公報記者許嘉信攝

　　大公網10月13日訊（記者許嘉信）响立法會選舉以23萬多票高票落敗嘅工聯會王國興，不但冇因為競逐連任失敗而感到意興闌珊，反而搵埋同樣落選嘅工聯會成員鄧家彪成立「23萬監察」，繼續監察政府施政同埋立法會議員嘅表現。興哥緣盡立法會，陪佢亮相多年嘅各式各樣道具亦已完成歷史任務，不過佢話，自己聯絡緊康文署，希望啲道具可以列入本港非物質文化遺產，保存响歷史博物館。

　　興哥响12年嘅立法會議員生涯入面製作過唔少道具，包括要求剪布嘅「金鉸剪」、爭取取消強積金對沖嘅豬仔錢罌，仲有控訴龕位難求嘅紙紮骨灰龕等，每一件道具背後都係一個議會故事。興哥話，自己至少都整咗過百件道具，全部都見證過立法會辯論同香港嘅歷史變化，希望歷史博物館可以收容佢哋，「如果送晒佢哋去堆填區就好可惜喇。」

　　興哥仲話，自己响上個月中已經去信康文署非物質文化遺產諮詢委員會，申請將香港嘅議會文化列為本港非物質文化遺產，康文署暫時都仲考慮緊。佢又希望申請「非遺」一事能夠盡快有結果，至於有冇信心能夠申請成功，佢就希望傳媒可以發吓聲，或者機會會大啲喎。

　　內地極速增長的億萬富豪來港投資。