新界西議員何君堯嘗試宣誓。大公報記者麥潤田攝

　　大公網9月30日訊（記者許嘉信）選港姐可以試戴后冠，連準備就任嘅立法會議員都可以綵排宣誓。立法會秘書處一連三日為新一屆立法會議員準備嘅迎新活動，今日終於圓滿結束。「新丁」議員除咗可以參觀大樓設施、了解會議程序之外，當然唔少得聽取秘書處職員講解點樣完成佢哋嘅人生大事-10月12號嘅宣誓儀式啦。其中，何君堯、周浩鼎（Holden）同埋陳沛然三位「新丁」，尋日先後自告奮勇，分別以基督教同天主教形式宣誓。見佢哋讀誓詞嘅時候都幾流暢，正式宣誓果日應該冇問題啦。

　　民建聯周浩鼎嘗試宣誓。大公報記者麥潤田攝

　　對於綵排感受，本身係基督徒嘅何君堯話「感覺良好」，能夠預先了解宣誓過程嘅走位，又話自己唔會響宣誓嘅時候加其他內容，只會着住套西裝、揸住本聖經咁讀曬篇誓詞。佢又話，全部70位議員都需要宣誓就任，而宣誓當日又要選立法會主席，所以希望大家到時可以以莊嚴、簡單同快捷嘅方式完成。

　　醫學界陳沛然嘗試宣誓。大公報記者麥潤田攝

　　此外，秘書處亦都為一班新丁議員提供貼心安排，可以為每人響會議廳公眾席嘅VIP區預留一個座位，俾佢哋嘅親友能夠見證呢個重要時刻。早前接受專訪期間大讚老婆給予支持同包容嘅Holden就話，諗緊邀請太太定媽咪出席好。怕唔怕順得哥情失嫂意？Holeden就話冇問題，到時「邊個得閒就請邊個」。