圖：梁天琦擘大眼講大話，屈完記者再將自己包裝成受害者

　　「本土民主前線」梁天琦奢華生活同幕後金主嘅真面目，相信讀者近日睇過《大公報》都知多咗唔少，但佢日前接受某傳媒訪問提到我哋記者早前追訪嘅經過，就明顯同事實不符囉，鄭晴都想喺度澄清返，以正視聽。

　　首先呢，我哋根本就無好似佢講到「跟蹤我家人，知道他們去過哪裏，做過什麼事，又知道我的親戚住在哪裏……都是以我家人作為威脅對象」咁樣，咁之前梁天琦透露全部家人已移民，我哋本住求真精神發掘真相，再向當事人提問求證，本身係傳媒應有之義，整個提問係基於新聞事實，網上有片為證！

　　報道針對梁天琦嘅誠信

　　我哋想強調返，成件事都係圍繞梁天琦作為一個政治人物嘅誠信何在，對於唔係公眾人物嘅梁爸爸亦都無公開佢嘅全名。再者，唔該搞清楚先後次序！係我哋收到風話梁天琦搬咗去月租兩萬起嘅太古豪宅康蘭居在先，至派同事去追蹤，並唔係佢講到好似被傳媒追訪至被迫搬屋囉！咁識擘大眼講大話，屈完記者再將自己包裝成受害者，難怪連鬧佢做「政棍」嘅黃毓民都要甘拜下風。

　　仲有，梁天琦喺訪問入面話會「退居幕後」為游蕙禎同梁頌恆提供論述，但又話議會內受結構所限，可以做的很少，咁當初又點解係都要參選？講到尾咪又係為咗16萬收入，就正如梁爸爸早前所講，「入立會一個月16萬，若做到議員好過當差！」真係「知子莫如父」！不過經一事長一智，梁天琦自認「能力未到」或會進修，都總算有啲自知之明。