圖：譚耀宗早前將部分書送咗畀學校圖書館

　　立法會換屆在即，即將卸任嘅民建聯立法會議員譚耀宗（譚sir）同葉國謙（阿謙），最近就忙於「執包袱」，騰出立法會辦公室畀候任議員用。兩位資深議員，各自都準備咗啲「心意」畀政壇後輩，譚sir就話會將自己嘅工具書送畀民記區議員；阿謙嚟緊就會應立法會秘書處邀請，向候任議員分享自己嘅議會經歷，仲話打算到時傳授埋「剪布」秘笈添！

　　立法會秘書處嚟緊將會為一眾候任議員，舉辦為期兩至三日嘅迎新活動，其中一個節目，係邀請葉國謙同即將卸任嘅民主黨主席劉慧卿（卿姐），向一班「議會新丁」講嚇議會事務同埋工作點滴。身為建制派「班長」嘅阿謙同鄭晴講，自己都仲度緊講咩好，不過見同場嘉賓係卿姐，咁就可以考慮嚇由自己講點樣「剪布」，卿姐就教班準議員點「拉布」，滿足曬唔同議員個需要喎。

　　萬般帶不走 煩緊書隨身

　　阿謙雖然告別議會生涯，但嚟緊仲有機會返嚟立法會，事關佢係行政會議成員，遲嚇特首梁振英出席立法會答問大會嘅時候，佢就可以「更上一層樓」，同記者一齊響公眾席上面睇住會議情況喇。佢話，新一屆立法會可能都會好似今屆咁，點人數鐘聲不停響，希望啲「新丁」能夠坐定定開會。

　　至於同樣係元老級人馬嘅譚sir，今次真係「萬般帶不走」喇，事關佢從政咁多年，辦公室放滿議會文件同資料，好似檔案館咁，依家就煩緊點樣處理好。譚sir曾任香港特區籌委會預備工作委員會成員，佢話當年好多文件，自己到依家都仲保存住，希望能夠轉贈畀政府，又話自己早前已經將一啲書本同資料送咗畀部分學校圖書館添，真係好有心啊！