大公網9月13日訊 （記者 許嘉信）後日就係中秋節喇，大家係咪諗緊嗰晚點樣同家人慶祝呢？但係財政司司長曾俊華就要響異地過節嚕，事關財爺尋日朝早已經出發前往哈薩克斯坦，帶埋一個大約30人嘅商界代表團響當地考察四日，要今個星期六先返港。財爺話，希望今次行程除咗能夠加強香港同哈薩克斯坦嘅經濟關係，亦希望可以探討一下兩地響「一帶一路」戰略下，可以有啲乜嘢商機同機遇。
講返呢個考察團，行程都幾豐富。財爺話，哈薩克斯坦係中亞最有規模嘅國家之一，天然資源十分豐富，亦係亞洲同歐洲嘅主要煤業重鎮。考察團會到訪哈薩克斯坦首都阿斯塔納，同埋主要商貿城市阿拉木圖，會同當地官員同商界人士見面，介紹一下香港各方面嘅優勢。
今次同財爺一齊去考察嘅，仲包括建築、工程、法律、IT、等界別嘅人士。財爺登機前亦有響自己嘅Facebook專頁上載咗一張同隨團成員嘅合照，包括立法會議員張華峰同埋葛珮帆（EQ），仲話今次係自己第二次嘅「一帶一路」之旅添。
EQ亦都響登機同財爺等人做咗次Facebook直播，話嚟緊幾日會考察哈薩克斯坦嘅金融、物流、基建等方面嘅發展情況，仲話會一路同大家報告行程添。
