圖：二叔婆抌心口
當「二叔婆」遇上不快事，如老公爛賭好嫖、兒子不務正業，「心抱／新抱1」刻薄對待，免不了呼天搶地、「要生要死」（叫生叫死）。為了營造及加強悲痛的效果，以博得各人的同情，從而迫使對方有所改善或稍作收斂，多會以手掌猛力拍打或拳頭捶打胸膛，亦即廣東人的「抌心／抌心口／抌心抌肺2」。
然而，「二叔婆」心中有數，即自己知自己事，捶打的力度和次數會拿捏準確，否則對身體造成傷害。這便有了以下一個與二叔婆「倚老賣老」相關的歇後語：
二叔婆抌心口─心中有數
「抌心口」的書面語是「捶胸頓腳」、「頓足捶胸」，用以形容極為悲哀、憤怒、懊悔等狀態。
示例1：
今期六合彩彩金過億，諗住買番十蚊，嗰六個號碼都諗好咗，點知行到投注站突然間肚痛，搞完一輪返轉頭投注都截咗止嘞。心諗，呢個世界冇咁好彩嘅，行行下街有嚿磚掟中你個頭就有份。
瞓到半夜，唔知點解「紮醒3」咗，咁咪開部手機睇下開邊幾個號碼囉。真係「不睇由自可，睇咗把幾火」，頭獎冇人中，我嗰幾個就中曬，即係話如果我買咗就一票獨得，今次見財化水，你話點可以唔「抌心口」吖，仲「抌到爆」
