圖：自證實患腦癇症後，雁心自我形象低落，數十年間她怕累人，甚少交友之餘，更未曾拍過拖

　　「我唔知幾時會無端端仆喺度，一仆有時幾秒、有時幾分鐘之後先醒返，我好怕呢種突然失去意識嘅感覺，可惜我無得揀。」雁心一番說話，說出了本港數以萬計腦癇症患者的心聲。腦癇以前俗稱「發羊吊」、「癲癇」，並不是精神病，只是大腦神經細胞短暫發出錯誤信息，以致患者出現突發如抽搐及短暫失去知覺等情況，該症與中風、認知障礙等同屬腦神經科疾病，惟社會普遍對腦癇認知不足，以致患者常承受社會不必要的奇異目光，令他們在一般日常生活中，處處受歧視。/大公報記者 方學明（文）　麥潤田（圖）

　　今年五十多歲的雁心，以「被戲弄」形容數十年間與腦癇症糾纏的心路歷程。「我係因為三歲嗰年發咗場高燒，之後就證實患有腦癇，當時平均每星期發作二至三次，每次持續兩至三分鐘先醒返，不過，大約二十歲之後，發作停咗，仲以為已經『斷尾』添，點知最近兩年又再發作，而家大概每兩個月發作一次。」

　　自我形象低落 抗拒交友

　　雁心指，一般發作前都會有先兆，例如胸口出現被壓迫感覺、腦袋像忽然被掏空等，然後整個人就會出現不規律的抽搐，繼而跌落地後失去知覺。然而，最近兩年發作，雁心指已再沒先兆，一發作便是馬上跌倒地上不省人事，無法預防。「佢（發作）話嚟就嚟，有次行行下忽然仆落坑渠邊，好彩當時有警察喺附近，睇到我跌倒後扶我起身，如果唔係都唔知點算。」雁心指着臉部處處撞瘀傷痕說。

　　然而，並不是每次發作經歷都「好彩」獲途人協助，很多次不愉快經歷，更成為她日後成長過程中不能磨滅的童年陰影。「我好記得好多次發作後清醒返嚟嘅時候，第一眼係見到好多人圍住我，佢哋用好奇怪眼光望住我，似想幫我，但唔知點幫，嗰刻我好唔自然，好尷尬，之後跑返屋企，喺床上用被遮住自己不停咁喊。」雁心承認因為這個病，自我形象低落，同時抗拒認識朋友。

　　「我啲朋友十隻手指數得曬，坦白講，除非好熟好熟嘅朋友，否則我係絕唔會同任何人講我有呢個病。」數十年來雁心因惡疾拒絕了不少異性的追求，她未曾拍過拖，更遑論組織家庭，「我自己知自己事，阿媽都同我講，話我有腦癇，唔好拍拖，費事累人，因為咁，我一直抗拒任何人主動認識我。」

　　社會認知不足 屢生誤解

　　正因如此，雁心數十年間一直啞忍自己內心感受，即使每天服藥也不能百分百防止病情發作，以致終日擔驚受怕，害怕突然腦癇發作。「我本身係幼稚園老師，做老師期間一直無發作，慢慢我將個病淡忘，但幾年之前，我喺課室教緊小朋友嘅時候，個病突然發作，之後暈咗，嗰刻我知道原來個病根本冇離開過我。」及後雁心沒再當幼稚園老師，她轉當義工，幫助其他腦癇患者及他們的家庭成員。

　　「我唔知有乜方法令自己唔發作，但發現心情好同無受太大壓力困擾時，發作機會確實減少了。」雁心願意講述自己數十年間患病的感受，希望社會有更多人關心腦癇症病人的實際處境。

　　「好多人對腦癇嘅認知好少，以致產生誤解，例如發作時有人會將毛巾或拖鞋硬塞入患者個口度，以為咁樣幫到患者；又以為腦癇係精神病的一種，每次見到有人發作，就用奇異目光望佢，其實，腦癇只係一個普通嘅病，佢同中風及認知障礙一樣，都屬腦神經疾病，我哋唔係傻，智商同一般人冇分別，只係我哋會間歇性突然失去意識跌倒，而跌倒醒返之後，同發作前根本冇分別，希望市民唔好戴有色眼鏡睇我哋。」