政府的「限奶令」實施接近五年，食物及衛生局副局長徐德義昨日就在立法會提出，「限奶令」實施以來，奶粉留用進口貨量保持穩定，除咗元朗、北區等地有短缺之外，2016年打後奶粉缺貨率相對較低，而奶粉券計劃近年亦不太多人用，覺得係時候檢討這幾年工作。之不過好多議員就話到明反對啦，大家都覺得「時辰未到」喎！
民建聯劉國勳話，即使而家有「限奶令」，奶粉其實都有缺貨問題，驚如果「真．撤銷」會令水貨問題加劇。
質疑是否商界施壓
民建聯梁志祥都講，而家都仲有人會以身試法，違反「限奶令」帶多幾罐奶粉返內地，反映內地對香港奶粉需求仍然好大，擔心香港市場不能夠應付內地龐大的需要。祥哥仲話，而家奶粉供應穩定，質疑政府是否受到商界壓力而檢討。
不過公民黨譚文豪就同大家唱反調話支持檢討，話好多時在機場，一落機就話人聽不准帶多過兩罐奶粉，旅客見到會好奇怪。徐德義副局表示，檢討「限奶令」的首要目標，係想保障本地嬰兒有穩定奶粉供應，重申檢討沒前設。
