圖：高鐵明年第三季就開通，時間好緊迫
特首林鄭月娥喺施政報告答問大會上，未有應允公民黨陳淑莊邀請，派律政司司長袁國強和運輸及房屋局局長陳帆出席反對派搞嘅大專青年論壇解釋「一地兩檢」。陳帆尋日喺電台就事件解畫，政府早已經喺多個公開場合解釋方案，仲講到口水都乾埋，解釋關注組一再要求嘅「車上檢」、福田口岸「一地兩檢」、兩地兩檢方案點解唔可行。既然講極都唔肯聽，陳帆擔心出席論壇只會引起社會更大撕裂，雙方「相見不如不見」啦。鄭晴也覺得帆哥講得啱，陳奕迅嗰首《不如不見》都係咁唱：「即使再見面，成熟地表演。」
但期間，港大學生會會長黃政鍀就烽煙（Phone-in）節目，話九月時有團體邀官員討論「一地兩檢」一直未獲答覆。於是陳帆又要再講多次，話從來無迴避過同市民及團體溝通，但高鐵明年第三季就開通，時間好緊迫，25號政府亦會就「一地兩檢」向立法會提無約束力議案，建議對方「不如睇睇動議辯論完咗之後吖，如果你哋覺得有需要、想了解多啲嘅，我哋再聯絡吖，好唔好？」
