元朗大馬路前晚放工時間忽然有隻牛狂奔，人人爭住影相拍片，警員接報到場救走隻牛牛，短片同相片喺網上瘋傳，好多人關心隻牛下落。事隔一日，香港警察喺Facebook轉載有關消息同圖片，仲同牛牛講「你慢慢行，唔使急，唔使快。我哋幫你殿後。」短短一小時，已獲得超過300人正評，有網民留言：「好有愛呀！」；漁護署回覆《大公報》查詢，話牛牛無受傷，正等待主人認領。
唔少網民話，元朗有牛有幾奇呀？不過有街坊話，涉事路段近YOHO Town，附近係元朗市中心，唔應該有牛出現喎。根據不同網民拍攝得嘅片段，由於當時塞緊車，牛牛跑嘅速度，比起旁邊汽車仲要快，有網民打趣話，不如索性騎牛收工。
鄭晴問過警方，發言人話，前晚六點接到市民報案，話喺屯門博愛醫院迴旋處一帶，發現有牛隻在馬路行走，其後喺朗河路上攸田村搵到隻牛，最後轉交漁護署，列作動物發現案。
唔少網民都好擔心牛牛下落，希望佢吉人天相。漁護署發言人同鄭晴講，隻牛無受傷，暫時安置喺動物管理中心，由於相信牛牛有人飼養，所以會暫時存放一段時間，稍後會移交打鼓嶺動物中心，等待主人嚟認領喎。
