大公產品

首頁 > 文章 > 正文

郭靖楊過令狐沖出沒 準備集郵!\鄭晴

時間:2017-10-04 03:15:11來源:大公網

  睇你骨骼精奇,絕對是練武嘅好材料,香港郵政將會出一本武功秘笈,仲唔嗱嗱聲買返本返屋企,攝高枕頭練功夫!你冇睇錯啊,呢本「太極拳」嘅秘笈,係由30枚郵票結合而成,當你快速翻閱就可以見到張無忌親身上陣耍畀你睇,好睇之餘又好玩。

  話說鄭晴尋日去咗香港郵政,聽佢哋介紹2018年發行嘅特別郵票。香港郵政總經理黃子純話,出年將會發行11款特別郵品,其中一套更首次以「金庸小說人物」做主題,一口氣推出六款郵票,全部都係金庸筆下粒粒巨星,仲請到有「金庸御用畫家」之稱嘅李志清設計極具收藏價值。

  六款郵票包括《射鵰英雄傳》的郭靖和黃蓉、《書劍恩仇錄》的陳家洛、《笑傲江湖》的令狐沖和任盈盈、《倚天屠龍記》的張無忌、《神鵰俠侶》的楊過和小龍女,以及《鹿鼎記》的韋小寶與康熙,而《天龍八部》的喬峯、段譽同虛竹更會以小型張呈現。

  黃子純仲話,最搶手嘅生肖郵票會喺出年1月27日發行,以瓷器、玉器、陶土玩偶及貝殼工藝的靈犬作造型。而配合2018年嘅主題「港習俗 港集郵」,亦會推出「節慶民間習俗」郵票,介紹貼揮春、拋寶牒等香港傳統習俗,仲特別用銀線勾勒的手展示動感,形神兼備。

  一月一日郵費變兩蚊

  鄭晴提提你,香港郵政會喺出年一月一日開始調整郵費至兩蚊起,為咗配合郵費調整,一月一日會推出2014香港通用郵票(新面額),用世界地質公園為題,介紹馬屎洲、印洲、花山。唔好話鄭晴唔益你,11款郵票同小型張已經可以上網訂購喇,仲唔快啲搶!

最新要聞

最新要聞

最受歡迎