一個社會難道可以無道德標準？教育局副局長蔡若蓮經歷喪子之痛後，教育大學民主牆出現對蔡若蓮人身攻擊嘅冷血標語，但教育大學學生會會長黎曉晴不但無動於衷，反而用道德無絕對標準嘅言論為學生開脫。
「從來沒聽過為人師表者會說道德是沒標準的。」行政會議成員、民主思路召集人湯家驊（Ronny）尋日聽到黎曉晴「道德沒有絕對標準，沒有人有道德批判權」嘅言論後有感而發。佢喺社交網站感嘆話，唔知呢位會長代表咗幾多教大嘅學生同年輕人，更唔知教大校長張仁良同校董馬時亨聽咗會有何感想，但佢自己聽咗卻係「不寒而慄」。「但願我們的下一代，不要遇上這一類『教師』……」Ronny一句說話，唔知道出咗幾多家長嘅心聲。老師對學生嘅影響至深，試問，邊個願意自己嘅仔女喺無道德底線老師嘅教育下成長呢？
