圖：網上近日流傳，有怪獸家長向學校發出律師信

　　講起讀書時期畀訓導主任檢查校服，例如內衣係咪白色、有無裙內着運動褲打底、對襪有無標誌，真係唔少人嘅集體回憶。網上近日流傳，有怪獸家長向學校發出律師信，要求校方檢查子女校服時，只可目測，如果要搜身睇內衣、量度裙長度，必須事先知會兼有家長授權。有網民留言嘲笑呢位家長：「咁唔信間學校，不如退學啦！」

　　事源「90後教師決戰怪獸家長」Facebook專頁，有自稱雙班主任之一嘅老師發帖，上周五開學，循例派發一堆通告，點知尋日收到家長嘅律師信，內容全英文，兼引用法律條文、教育局行政指引、個人資料私隱、性別歧視條例等，列出多項要求。除咗查校服，信內仲要求，學生行出校園，就唔受訓導規限，例如「不可回到校內之後，話你前日去了哪裏哪裏，又穿校服，又影響校風，要記小過」；除非有家長授權，否則學生名字、照片唔可以放喺學校網頁、學校印刷品上宣傳。

　　律師信註明，老師必須七日內回應，否則視為同意條款。呢位老師唔知點處理，求救完校方，仲打電話問呢位家長，對方話對學校通告有意見，所以由律師處理，仲叫老師聯絡律師喎……

　　鄭晴同資深校長林日豐傾過，佢話從事教育33年，從未聽聞家長為咗檢查校服而向學校發律師信，慨嘆家長行為真係「日新月異」。佢認為，家長出律師信一刻，已經破壞家校關係，等同劃清界線，「學校或老師唔會針對小朋友，但事件一傳開去，好難掩住其他人把口！」佢反問：「將來小朋友投入社會工作，家長又會唔會向公司發律師信，要求多多呢？咁究竟係幫佢，定係害佢？」