圖：馬紹祥下周起會出任香港科技園公司顧問

　　喺今年六月底任滿離職嘅前發展局局長馬紹祥去向揭盅啦！原來佢下星期一起，就會出任香港科技園公司顧問，負責落馬洲河套區「港深創新及科技園」嘅策略性部署同設計總綱發展藍圖！

　　科技園公司行政總裁黃克強就話，歡迎馬紹祥加入，仲話馬有多年建造界經驗同深厚嘅專業背景，可以配合規劃同管理「港深創新及科技園」喎！

　　馮煒光寫專欄出書

　　馬紹祥2014年1月出任發展局副局長，2017年頭接替升任財政司司長嘅陳茂波，正式出任發展局局長。馬入政府前，仲做過多間大型建築公司高層，例如AECOM亞太區土木及基礎設施執行副總裁，同茂盛（亞洲）顧問公司董事總經理等。

　　另外，前任行政長官及政治委任官員離職後工作諮詢委員會亦公布，接納前行政長官辦公室新聞統籌專員馮煒光，同前中央政策組全職顧問王卓祺離職後的工作申請。

　　馮煒光除咗會開公關顧問公司同擔任董事總經理，九月起亦會擔任自僱財務顧問；佢仲會做埋作家，喺報紙寫專欄，同出版一本書，內容係關於英國97前喺香港嘅角色；10月起又會為網媒《HKG報》擔任自由身評論員，評下內地最新發展動向。

　　至於王卓祺，就會擔任香港中文大學亞太研究所嘅名譽高級研究員。