巿民買六合彩、買馬無非都係想中獎發財，但原來年年都有唔少「失魂魚」令幸運錢白白溜走。上年度馬會無人認領嘅六合彩同賽馬彩金高達1.24億元，其中六合彩佔6700萬元，較2015/16年度大減近四成，係連升三年後首度回落，但無人認領嘅賽馬獎金就有增無減，由2013/14年度嘅5100萬元，增至上年嘅5700萬元。
原來根據馬會現時嘅安排，六合彩或買馬彩票嘅有效期都係60天，幸運兒要喺攪珠或賽馬日後60天內領獎，逾期無效。無人認領嘅六合彩獎金，會撥入金多寶彩池，成為日後金多寶攪珠嘅彩金；至於無人領取嘅賽馬彩金，會撥入馬會慈善信託基金，惠澤慈善機構。
鄭晴翻查資料發現，過去數年無人認領嘅彩金真係唔少，由幾千萬至成億不等，但講到歷來最高無人領獎嘅六合彩獎金，應該要數1998年3800萬嘅中秋金多寶頭獎，當年一度引起轟動，事件經傳媒披露後，成百人爭住去領獎，但原來都唔係真正頭獎得主；至於無人認領嘅賽馬彩金最高紀錄，真係唔可以唔提2001年11月6日嘅1.18億元巨額三T。
