香港人識飲識食，每年平均食超過70公斤海鮮。龐大嘅需求背後，引發濫捕、漁獲不足等問題。唔想第日無得食海鮮大餐？下月起同鄭晴一齊響應「健康海鮮節」喇！出街食海鮮，識食，肯定係食環保海鮮！
由本地非牟利組織「海洋復原聯盟」發起嘅「健康海鮮節」，今年嚟到第二屆，過百間本地或海外嘅餐飲企業參與，下月起提供至少一款由環保海鮮烹煮嘅菜餚。聯盟創辦人Doug尋日同鄭晴講，社會主流意見贊成食環保海鮮，但有一半人唔清楚咩係環保海鮮，66%人更加唔知點選購或享用環保海鮮，所以希望透過活動，令海鮮供應商、零售商、餐廳、顧客都了解環保海鮮嘅重要性。
