▼為期四日電腦節尋日煞科
本港上星期五日內接連有十號波「天鴿」、八號波「帕卡」掠過，「帕卡」風力雖然唔及「天鴿」，但足以令香港電腦通訊節蒙受經濟損失。為期四日嘅電腦節尋日結束，今屆共錄得80萬人次入場，總營業額三億元，數字雖然同上屆差唔多，由於八號颱風懸掛期間，電腦節要暫時關閉，星期日就咁就冇咗半晝生意，單日生意按年跌近40%，真係陰功豬！
鄭晴聽電腦節發言人講，今年電腦節首兩日，入場人次按年升15%，銷情都幾理想㗎，但星期日「黃金檔期」撞着「帕卡」八號波，埋單拉勻四日展期計數，估計今年比舊年賺多約5%至10%，叫做不幸中之大幸。電競熱近日流行，場內產品以電競電腦、屏幕最好賣，平均收益按年升超過30%至40%，發言人預測，電競產品由下半年至明年，仍然會受歡迎，陸續有更多品牌、廠商加入戰場，分一杯羹。
換言之，係咪意味住競爭大咗，電競產品嘅價錢可望愈來愈大眾化呢？用家們敬請期待。
