圖：20名特區同齡人到比利時交流
香港嘅遠足籌款活動「樂施毅行者」11月先舉行，但有20位來自香港嘅「特區同齡人」，本月24至31日已率先到比利時參加「港毅行．港精神」交流活動，其間仲參加當地舉行嘅「毅行者」！香港駐布魯塞爾經貿辦發言人話，呢個活動係為慶祝香港特區成立20周年而舉辦嘅重點活動，希望今次活動資助呢班同政府一起成長嘅20歲仔開下眼界，同時參與更多社會事務。
比利時「毅行者」路線，途經比利時貝華倫市最靚的High Fens郊區。呢班廿歲仔就分成五隊，依靠沿途檢查站供應的熱飲和小食維持體力，通宵達旦毅行長達30個鐘。大會話，連同另外七隊來自香港嘅成人隊伍，今次活動總共有260多隊參加，所有港隊都成功完成賽事，當中有兩隊更加係頭五名，咪話唔威水。
