大公網訊 (記者龔學鳴報道)公務員事務局局長羅智光(Joshua)，今日去咗同一班參加政務職系實習計劃嘅大學生見面，仲分享自己經驗，鼓勵大學生加入政務職系添！到底點解Joshua局長會加入政府呢?原來佢當年喺海外讀書嗰陣，希望畢業後可以做自己鍾意又有意義嘅事，有諗過喺第三世界國家工作，或者喺音樂方面發展。不過，佢認識咗一班有理想嘅年輕政務主任(AO)，令佢決心返香港服務社會。Joshua局長仲話，AO是每隔幾年就有機會做唔同崗位，係一個好吸引佢嘅原因。Joshua局長仲話，希望喺九月請40幾名AO呢！
今年有51名大學生獲安排到15個決策局和部門，負責做啲同AO職務相類似嘅工作，喺本地大學讀書嘅林永達，今次就喺財政司司長私人辦公室實習，協助政策研究、撰寫演辭和網誌。永達就話，自己可以同財政司司長出席唔同《施政報告》諮詢會係寶貴經驗，而佢對AO工作好有興趣，認為要令社會更美好，最直接就係成為AO。
