圖：梁耀忠辦事處門口有一間懷疑係僭建嘅「木屋仔」

　　街工立法會議員梁耀忠喺葵青區「扎根」多年。最近有葵芳邨居民向鄭晴爆料，話梁耀忠辦事處門口有一間懷疑係僭建嘅「木屋仔」。鄭晴於是去現場睇睇，發現佢辦事處正門旁邊真係有一個用白色木板圍起的「木屋仔」，點睇都唔似原本建築嘅一部分。

　　白色「小木屋」大約有兩米乘一米半，正面掛咗分體式冷氣機，冷氣喉直通梁耀忠辦事處。「小木屋」嘅側面就掛咗個「街坊工友服務處」嘅通告板，板上擺放咗啲街工嘅宣傳單張，旁邊仲有用鐵鏈鎖住嘅木門。「小木屋」入面放咗啲咩鄭晴就唔知，但明顯係擴大咗梁耀忠辦事處嘅空間。

　　有街坊話間「小木屋」喺辦事處門口好多年，大家都知道間木屋係由梁耀忠辦事處伸延出嚟。街坊都話覺得初時見到個門口有間「小木屋」都覺得怪怪地，但一直都無諗過僭建嘅問題。

　　不過，梁耀忠都唔係第一次涉及僭建，2011年，梁耀忠喺佐敦間屋，畀傳媒揭發喺天台僭建簷篷。當時梁耀忠承認一早收到屋宇署清拆通知，但就話係管理公司要求等待大廈維修時先一次過處理，之後佢都拆咗個僭建簷篷。

　　梁耀忠辦事處嘅「小木屋」係咪僭建物？鄭睛問過梁耀忠同房屋署。梁議員話嗰個唔係「小木屋」，只係擺放物資嘅地方，為咗放得好睇啲，所以將個地方圍起嚟喎！梁又話：「1991年向房署租辦事處時，合約將個地方納入咗辦事處範圍，所以一直有擺嘢，最近房署話驚啲雜物整親人，所以我咪叫同事將啲嘢搬走。」房屋署發言人話：「所指的『小木架』乃租戶於上址單位外所放置的物件及圍封雜物架，經勸喻後租戶已經清除。」