反對派近日開足馬力聲援因「衝擊政總」案而被判監嘅「雙學三囚」，連身在美加嘆世界嘅天主教香港教區前主教陳日君都不甘寂寞，喺網誌寫文亂噏所謂「香港沉淪」，抹黑「司法已成為政治鎮壓的工具」。睇到「雙學三囚」求仁得仁，曾陪同「佔中三丑」自首但警方唔多理佢嘅陳日君，可能覺得面上無光，就話如果回港得償所願被「預約拘捕」，可以搖身一變「從探監者變成階下囚，能來陪伴獄中的兄弟姊妹，將是我的光榮。」
鄭晴聽到陳日君講呢啲說法，都覺得幾好笑，雖然表面上係撐黃之鋒、周永康等人，但實際上只係唔想光環都被年輕人搶走。大家都仲記得，喺違法「佔領運動」初期，陳日君就不忿運動嘅主導權落係小鬼手上，寫文批評學聯「騎劫」「佔中」、「行錯路」，又話「打仗無人指揮，你會贏嗎？勇字當頭是不足夠的。」呼籲學聯邀請「佔中三丑」及學者等合力組成聯盟，同政府談判，最終一班小鬼唔多睬佢。其實反對派所謂為公義而「公民抗命」，無論把口講得幾咁大義凜然，其實都係各懷鬼胎，大家有着自己嘅政治利益盤算。
