戾橫折曲、顛倒黑白，一向係反對派嘅拿手好戲。香港眾志尋日擺街站聲稱要「講清事實」，將暴力強闖衝擊政府總部東翼前地嘅黃之鋒、周永康、羅冠聰形容為「正直善良、愛護香港嘅朋友」，仲話佢哋「多年嚟為香港付出好多。」
鄭晴聽落，真係覺得「毛管戙」！由幾時開始，「暴力衝擊」可以同善良正直畫上等號？「愛護香港」就係通過奪取政總東翼前地、79日非法「佔領中環」，將香港呢幾年搞到烏煙瘴氣？唯一一點鄭晴認同嘅，就係佢哋的確付出好多，不過唔係為香港好，而係為破壞香港付出好多！
香港眾志常委周庭話，前日遊行籌得200幾萬港元，會攞嚟支援入獄者嘅家人，同買日用品畀獄中人士，用曬之前唔會再籌款。但佢哋派發用作「講清事實」嘅單張，對事件始末草草帶過，喺頁末話，該組織失去立法會議席後資源日益緊絀，仲詳細寫埋郵寄同網上嘅捐款方式，其實無非就係通過打悲情牌，趁機「掠水」罷了。
