反對派尋日又就反對「一地兩檢」方案搞論壇，被DQ立法會議員資格嘅姚松炎喺論壇介紹所謂「一地兩檢關注組」嘅「方案」，現場有年長市民行埋嚟同佢講道理，估唔到姚松炎竟然火遮眼還口，同阿伯上演一場「怒火街頭」！
呢位阿伯語氣略帶憤怒，佢向姚松炎表示意見，認為香港無可能要內地方面喺各地高鐵站加設通關設施，姚提出呢啲要求根本唔合理。姚松炎同阿伯講唔夠幾句，突然失去耐性，扯曬火，一直重複叫老先生「你諗清楚先啦。」阿伯發覺姚松炎根本唔想同佢傾，最後就行開咗喇。
叫人諗清楚？其實姚松炎你又諗清楚未呀？現場所講的所謂「可行短期過渡方案」，好似「車上檢」、預設通關檢查等等，其實政府咪一早解釋得好清楚囉！高鐵香港段行車時間太短，根本做唔到「車上檢」呀。
「佔中三丑」之一、港大法律系副教授戴耀廷仲好笑，佢尋日又「唔講法律講政治」，話覺得政府推出方案係涉及政治考量喎。其實律政司司長袁國強都已經正面回應過啦，提出「一地兩檢」方案係為咗向乘客提供便利，發揮廣深港高鐵嘅最大優勢，並無任何政治原因，到底戴耀廷你有無聽書？
